IGNAZIO BUTTITTA A CARLO LEVI

 LU TEMPU E LA STORIA

IGNAZIO BUTTITTA

a Carlo Levi

Quantu strata,

quantu lacrimi

e quantu sangu ancora, cumpagnu.

La storia zappa a cintimitru

e l’omini hannu li pedi di chiummu.

Nun parra l’amarizza

chi mi cummogghia lu cori stanotti,

né le scuru supra li muntagni,

ma lu silenziu

di seculi luntani.

È la puisia

chi tocca lu pusu di la storia:

la vuci risuscitata di Maiakovski,

lu chiantu di Hiroshima,

lu lamentu di García Lorca

fucilatu a lu muru.

Quannu ti pari c’arrivi,

sì a l’accuminzagghia, cumpagnu;

nun t’avviliri di chissu,

seguita a svacantari

puzzi di duluri,

àvutri vrazza

doppu di tia e di mia virrannu.

A l’ingiustizia c’ammunzedda negghi

e nverni friddi

supra li carni di la terra,

ciusciacci lu focu di lu to amuri.

Nun ti stancari di scippari spini,

di siminari a l’acqua e a lu ventu;

la storia nun meti a giugno,

nun vinnigna a ottuviru,

havi na sula staciuni:

lu tempu.

Nun t’avviliri, cumpagnu,

si nun ti sacciu diri

quannu lu suli

finisci di siccari

li chiai di la terra.

Ignazio Buttitta da La Peddi nova ed Sellerio pag. 71