Giovani poeti a Ciminna

Nell’ accogliere con piacere la notizia del Simposio che si terrà mercoledì prossimo a Ciminna (PA), desidero segnalare i versi in lingua siciliana di un giovane di quel paese, Domenico Passantino ,  che esprimono con forza il disagio e la rivolta che cova nei cuori di tanti giovani soffocati da contesto mafioso che ancora domina la nostra provincia.  

 

                                   Ca raggia ‘nto cori  (Con la rabbia nel cuore)

Tu a mia nun ma taliari mancu di luntanu,

picchì sinnò mi scordu ca sugnu omu e menzu cristianu

e vegnu ‘ddocu e ti vegnu agghisu i manu.

Beddi forti l’haiu i vrazza

(veni ccà, ca ti l’ammaccu sta tistazza)

e ‘nte manu ci haiu i cadda di i  me nanni,

i me nanni ch’avianu i rini a croccu già a cinquant’anni,

ogni notti mi riranu ‘nto sonnu e ogni gghiornu m’abbramanu ‘nto cori.

Sputatu e ‘nfami,

ha’ fattu u scartu sempri chi puvureddi e chi ‘ngnoranti,

ma si ha curaggiu ora fatti avanti,

unn’ haiu bisognu nè cutedda e mancu lami

veni ccà

quantu ti lu scippu stu cori disonestu ,

ti lu  scripentu e poi ci lu dugnu o signiruzzu ch’avi a fari u restu.

A verità è ca si lagnusu,

e forsi pi chistu fa u mafiusu,

si favusu ‘nta l’occhiu

e t’annachi u rinocchiu,

ma finiri avi sta babbitudini ru sicilianu

ca si senti chiù forti cu sta vasata di manu,

un ci criu ca passanu cieli e mari

e nun havi a passari

sta trinchillanza

o cuvernu di l’omini di panza,

una panza grossa, ma senza ficatu,

picchi sulu ca prepotenza

sannu essiri comu l’armali

p’a raggia chi hannu di cumannari.

Nuddu s’avissi

a accuntintari

d’a muddica

chi ci cari

a sta genti;

sti”assa benerica”

avisssiru a addivintari un nenti

pi priari sulu e santi;

I porci si l’avissiru a manciari

i nguanteri

chi fannu i mugghieri

pi i dottura,

ca nun su favura

chiddi chi fannu.

A visita chi ti fannu paari

è megghiu di chidda d’u spitali,

e si ti sfurni u culu a travagghiari

si pigghiatu pi minchiuni

picchì a regola cà è farisi a viriri bravu e futtiri ammucciuni.

 ------

Chi minchia ni sapiti?

Chi minchia ni sapiti

di chiddu chi succeri

quannu u suli, a sira, codda?

Chi minchia ni sapiti

ca ti manca a terra sutta i peri

siddu a testa un t’arrimodda

e unn’ha un amicu chi t’aiuta?

Chi vuliti cu sti banneri

e cu stu parrari c’aviti bonu bonu?

vuatri ca siti stranieri

un lu sapiti chiddu chi succeri

ccà,  tra omu e omu.

Quannu  a sira nesci, ccà,

‘nte strati scogniti è megghiu un ci iri,

e non picchì ti futtinu u partafogghiu,

-chi c’è, babbu, a cu talii?-

ma picchi, pi ‘nmrogghiu,

po’ viriri ‘nzoccu è ca viriri unn’avii.

Minchia, mi veni di ririri,

si pensu sta ‘ngnoranza:

ccà, uun’è chi ognunu è re ‘nta so casa e ‘nta sò stanza,

mutu, chiddu chi pensa si l’avi a teniri ‘nta panza.

Chi vuliti dottura e sindacalisti,

c’aviti amici

chi fannu travagghiari e dunanu pinzioni,

chi vuliti, minchiuna, i voti pi l’elezioni?

Cristiani ca ccà un ci stati

e sti cosi un li viriti,

un li sintiti

e un li sapiti,

i dottura ccà sù puru sindachi e presidenti

e si Diu accetta una ‘nguantera di cannola e strinci i denti,

quannu morinu, su capaci d’addivintari  puru santi.

Ci senti?

U signuri unn’esisti sulu pi Natali,

‘nmenzu a ‘mpanatigghi e purciddati,

e mancu a mafia, è megghiu ca u sapiti,

esisti sulu quannu si parra di cristiani chi mureru, ammazzati!

Sta filastrocca forsi ti fa ririri e pensi ‘nta to menti:

“delinquenti? un dici a mia, un dici a mia”,

ti cachi d’incoddu,però, ammutolisci, mi scanzi e canci via;

picchì lu sa ca io dico a tia,bastardu, propriu a tia!   

Domenico Passantino