LU SONNU DI GIUSEPPI

 L'amica Grazia Messina mi ha trasmesso qualche giorno fa una poesia scritta in dialetto catanese. Anche se Natale è passato la poesia mi pare che meriti ancora di essere letta:

 

LU SONNU DI GIUSEPPI                                             

- Maria – dissi Giuseppi

ccu st’IMU c’ama ffari?

si chista è mangiatura,

cchi ffa, l’ama pavari?

Dumannici a to figghiu,

ca iddu sapi tuttu;

ma varda u portafogghiu,

mi sa ch’è beddu asciuttu!

Gesù – dissi Giuseppi

ci addumannai a to matri

si ppi sta mangiatura

pavamu puru nuatri,

ma idda non sapi nenti

e dissi di spiari

a ttia ca si sapienti

e sai zoccu a ffari.

“Si avi na simana

ca mangiu favi cotti,

chi c’ ha a pavari IMU,

accatta du viscotti.”

Sintennu sta risposta,

Giuseppi va a lu Tempiu

ppi sentiri cunsigghi

e ppi pigghiari esempiu.

‘Nto Tempiu attruvavu

‘na fudda di pureddi

c’a fami ‘nta la panza

si la tagghiava a feddi.

Supra n’artaru autu

lu capu da cumarca

diceva a tutti ch’erumu

ormai ‘nta stissa barca,

ca ppi sarvari a Patria

l’IMU l’ava pavari

cu non n’avia nenti

e ccu ci avia dinari.

-Ma comu – dissi Peppi

si sordi ci nn’è picca,

e ci pavamu l’IMU,

mangiamu allicca allicca?

“E chi vulissi fari

Se u spread acchiana e scinni?

Arrusicati ossa

e poi agghiuttitivilli!

Ata mangiatu e vippu

Di troppu ‘nto passatu

E ora, sacrifici,

di panza e di palatu”.

Turnannu a mangiatura,

Peppi pinzava o figghiu;

chi mancia a minzijounu?

Né scagghiu e mancu migghiu?

Quannu arrivau a casa,

Giuseppi a mussu strittu,

ci dissi a so figghiuzzu:

“Dumani, pani schittu,

ca chiddu ca n’arresta

‘nto portafogghiu – giuru –

a stentu ci accattamu

‘npizzittu ‘i pani duru”

Gesù si ‘ntisi ‘nfremitu

ca ci passau ‘nta schina,

si susi e tira ‘nsautu,

spingennisi ‘ncarina.

Ci dissi a so matruzza:

“Pripara la pignata

e ‘nvita a tutt’i poviri

ca su ‘nta sta cuntrata.

Maria si spavintau

e dissi – chi cucinu

ca non c’è pani e ogghiu,

né sali e mancu vinu?

Gesù vardau ‘nta ll’aria,

parrau ccu Patri Ranni

ca prestu ci mannau

mangiari a tutti i banni.

Carni arrusstuta e pani,

piatti d’oru finu,

sasizza e custuletti,

café, champagne e vinu.

Di tutti li cuntrati

spuntau tanta genti,

c’ammenu avia ‘nmisi

ca non mangiava nenti.

Gesù ci dissi a tutti

ca chistu è ‘nmunnu persu

E avia rrivatu l’ura

di darisi di versu.

“Ora c’amu mangiatu,

c’i u damu ‘nbellu esempiu?

Pigghiati li zappuna

e ni nni emu ‘o Tempiu,

ppi dirici a ssi quattru

latruna senza schina

ca l’IMU l’ha pavari

cu avi a panza china.

Ppi oggi fu ‘nmiraculu,

dumani chi faciti?

Si non vi dati versu

Di fami ci muriti”.

Li poviri partenu,

Urlandi furiusi,

ma … Peppi si sbigghiau

e apriu l’occhi chiusi.

“Cchi fu? Chi m’insunnai?

Maria, chi fu? Rispunni!

Unn’è tutta dda genti,

unn’è to figghiu, unni?”

Maria lu carizzau,

ci dissi: “Peppi, dormi,

ch’o figghiu è beddu chetu;

n’o risbiggiari, dormi.

Sonniti ‘nmunnu ‘i paci,

e stringimi la manu,

ca si non ci ll’avemu,

ammenu n’u ‘nsunnamu”.

Paolo Sessa

(Natale 2012)