Ezio Spataro stasera a Milano...

Mi scuso del ritardo con cui dò la notizia. Ma, meglio tardi che mai!

Ecco due delle poesie proposte da Ezio alla CAM Garibaldi di Milano:

Acidduzzu

Acidduzzu ca ngagghiasti

nta li riti tradituri

lu desertu tu lassasti

cu li razzi migraturi

Comu fu ca tu passasti

e li riti nun vidisti?

Troppu bonu u to pinsari

ca unn'egghè sapii vulari.

T'arrimazzi nta la argia

cu lu beccu nsanguliatu

la to scerta nun fu saggia

d'arristari dda ngagghiatu

troppu vasciu tu vulasti

unni consanu li riti

nta sta trappula ammucciata

ca fa tutti scimuniti

Ora vegnu e ti la dugnu

na spiranza scanusciuta

iu t'afferru nta lu pugnu

e lu grapu a to nsaputa

Ma t'arresti ancora fermu

ti scurdasti ca vulavi

si nisciutu di lu nfernu

ma nun movi ancora l'ali.

Nun ci cridi ca davanti

c'è lu munnu ca t'aspetta

avi assai ca cchiù nun canti

stannu dintra a la gabietta..

Nta lu cielu ora ti eccu

e ribatti li to ali

si cci teni a lu to beccu

ta nsignari arrè a vulari.

 

Na petra

A principiu di na sciarra

chi si voli rispittari

c'è la rabbia di cu parra

prima ancora d'attaccari.

C'è l'offisa ripituta

di cu voli la raggiuni,

la so vucca nun s'astuta,

si pripara un timpuluni.

E s'addumanu li nerbi

di na sciarra assai cuvata

la parola ormai nun serbi,

e già parti na lampiata.

Li cristiani a giru a giru

su curiusi di sta rissa,

ci su facci misi a tiru,

e si grapi na scummissa.

Nta lu vivu di la lotta

hannu pugna già sirrati,

cu si piggha n'atra botta

avi l'ossa già spaccati.

S'aizzaru comu cani

ca si grattanu la rugna,

sà chi spinci nuatri umani

a sirrarinni li pugna..

E dda petra assai tinuta

nta na manu stritta e chiusa

di lu sangu fu tinciuta

e di n'terra ancora accusa:

"Sugnu petra di muntagna,

lu me regnu è minerali,

e ssa testa chi guadagna

arrivannu a lu spitali?

A lu regnu di l'umani

sempri stetti suttumisa

mi pistaru porci e cani

ma sta cosa un c'era misa!!

Di la terra mi pigghiaru

p'attaccari lu nemicu

di ssa testa c'ampicaru

nn'arridducinu na ficu!"