D. PASSANTINO, Sutta a Busàmmara

      Domenico Passantino  descrive con grande realismo, usando l'antico dialetto che ancora si parla nel suo paese (Ciminna, PA), il dilemma in cui si dibattono i migliori figli della Sicilia odierna che, non volendo adeguarsi alla mentalità mafiosa che ancora regna in tanti paesi del meridione d'Italia, sanno che non hanno altro da fare che emigrare. (fv)


A Busàmmara abbianchìa:
c'è a nivi 'ncapu a muntagna,
ognunu a squatra e s'a talìa
comu si fussi a so cumpagna.

Io sugnu unu di chiddi ca di ccà nun scugna,
un cristianu a pani e acqua chi sparagna,
ccà mi lassà a cicogna
e nun sacciu si ghirisinni o arristari è chiù vergogna.

Talìu i zabbari e i ficurini,
talìu 'sti genti accussì scarti ca su' cretini,
su' beddi comu u furmentu a giugnu,
ma pronti a puncirimi si ci 'ncugnu.

E io 'nto pettu haiu un cutugnu
a biriri 'sta terra ca è un panaru di spini:
nun m'u vogghiu scurdari cu nascivu e cu sugnu,
ma nun vogghiu mancu addivintari comu i cretini.

E allura comu a fari a stari 'cca, sutta a Busàmmara?
I così su dui: o 'nchiusu 'nta me càmmara
o "vossìa benerica" e "baciamu li manu":
e mi sentu 'na merda, no un cristianu!

Haiu dui vuci prepotenti
'nta me testa:
una dici: "resta";
l'autra: "vatinni ca non c'è nenti!"

Ccà c'è ogghiu bonu e u megghiu mustu,
ma un si capisci cu è daveru giustu,
ccà c'è vinu e ricotta
e pi festi di' Santi sparanu botta;

ccà c'è ménnuli e racìna,
ma haiu un gruppu 'nte cannarozza ogni matina,
quannu pi cuminciari a iurnata
viu o zu Minchia 'nmenzu a strata

e, si vogghiu stari cuetu,
nun n'ha sentiri fetu,
ci haiu fari a 'ncinsiata,
a ripassata,
a 'ncanistrata:
"Bona giornata, comu iamu?
vuatri sì ca siti un bonu Cristianu,
e p'u beni c'aviti fattu nun c'è nummaru né misura
e chiddi chi ni dicinu mali su sulu traritura!

Chistu è sicuru..."
Ma chi cazzu è chi è sicuru?
Ca m'aviti futtutu a vita,
e puru u futuru!

DOMENICO PASSANTINO