D. PASSANTINO, Banneri fora tempu

domenico passantino

Mentri liggìa i poesii di Buttitta
mi parsi ca chistu mi dicìa 'na paruledda stritta,
dda vuci 'nto fogghiu nun era sulu scritta,
ma parrava comu si iddu fussi ancora addritta,
e mi gridava di tanta 'mminnitta
di patruna e di puvuredda;
mi gridava c'cun pugnu chiusu
e mi strincianu i vuredda;
mi sintìa chiù nirvusu
liggennu di capizzuni e vardedda
chi l'omu mafiusu
ci carricava ai picciuttedda.

Ora stu tempu camina chiù cunfusu
e un sacciu chiù cu è chiù merda:
si è un politicu, un parrinu, u sbirru o è ancora e sempri un mafiusu,
chi mi 'ngargia,
nun lu viu chiaru stu potenti prepotenti chi mi fa raggia:
paremu tutti uguali
comu mascari di carnalivari,
paremu rina rusicata d'u mari,
e un capemu chiù unn'è u beni e unn'è u mali.

Forsi pi chistu 'sta vuci mi continua a gridari,
picchì haiu vuci e nun sacciu parrari,
haiu aricchi surdi e occhi 'mpiccicati,
haiu banneri russi sarvati,
ma su tutti sfardati.

Banneri fora tempu,
'nta 'stu tempu chi vola comu un lampu,
veloci comu 'na farfalla o un aceddu,
'stu tempu chi mi fa zappari u me iardineddu.

I professura u chiamanu "riflussu"
'stu tempu fattu di cos'e lussu,
'stu tempu chi fa tutti e nuddu famosi e santi,
'stu tempu chi ni metti u saccuni 'nto mussu,
'stu tempu chi ni lassa cu l'occhi chini e c'a testa vacanti.

Domenico Passantino