TURIDDU CARNIVALI IN ALCUNI VERSI DI PINO BATTAGLIA

 

La madre di Turiddu Carnivali

Il poeta Pino Battaglia

A rendere omaggio al nostro Salvatore Carnevale, ucciso dalla mafia il 16 maggio 1955 a Sciara, non solo i componimenti di Ignazio Buttitta e del cantastorie Franco Trincale, ma anche l'opera del conterraneo Giovanni Giuseppe Battaglia di Aliminusa:

“Turiddu”

Lu mortu nciardatu di sangu

parra e l’aceddi

all’arbuli e a lu siminatu

e si mutria

ca nun po’ mannari cchiù l’aceddi

a cantari nta li campagni

a discurriri di omini santi e diavuli;

e farisi vasari picchì li fici iri

supra li ucchi

di li puzzi, cu li pizzi aperti,

a tastari l’acqua di la libirtà.

E si mutria di nun putiri cchiù chiantari, abbivirari e putari

l’arbuli e arrimpicari la cchiù

bedda fogghia di mettiri

nta lu libbru vecchiu di la storia;

e lu ciuri supra lu tavulinu

tra li muddicchi di pani

e l’ossa di l’alivi e lu ritrattu

di lu patri.

E di nun putiri siminari a nuvembri

mancu arricoghiri a giugnu

e aiutari la matri a nfurnari lu pani.

Quant’era beddu Turiddu

cu un ciuffu di capiddi niuri

chi s’appuzzava nta la so frunti.

Quant’ea beddu cu li manu ncruci

e cu la testa

chi taliava a lu suli.

Quant’era beddu

mentri taliava

nta ll’occhi a so’ patri

nta ll’ariu russignu

e la matri si lu vasava

si lu strincia

ci affirava li manu

e ci vuleva dari ciatu

ma nun sapia ca li picciriddi

divintavanu omini

cu lu ciatu d’iddu;

ci vuleva dari la vuci

ma nun sapia

ca iddu parrava

cu la vuci di li poviri

di li jurnatera e di li viddani

nta li trazzeri;

ci culeva dari sangu

ma nun sapia

ca a li jurantera di Sciara

ci arrivugghievanu li sangura

cu lu sò sangu pi li strati

di lu munnu.

GIUSEPPE GIOVANNI BATTAGLIA

Tratta da: La piccola valle di Alì, prefazione di Leonardo Sciascia e con un disegno di Renato Guttuso Palermo, Flaccovio, 1972