Una poesia di D. Passantino dedicata a P. Impastato

Pi Pippinucciu, testa pazza!

Sutta a Busàmmara

A Busàmmara abbianchìa:
c'è a nivi 'ncapu a muntagna,
ognunu a squatra e s'a talìa
comu si fussi a so cumpagna.

Iò sugnu unu di chiddi ca di ccà nun scugna,
un cristianu a pani e acqua chi sparàgna,
ccà mi lassà a cicogna
e nun sacciu si ghirisìnni o arristàri è chiù vergogna.

Talìu i zabbàri e i ficurìni,
talìu 'sti genti accussì scarti ca su' cretini,
su' beddi comu u furmentu a giugnu,
ma pronti a pùncimi si ci 'ncugnu.

E io 'nto pettu haiu un cutùgnu
a bìriri 'sta terra ca è un panàru di spini:
nun m'u vogghiu scurdàri cu nascivu e cu sugnu,
ma nun vogghiu mancu addivintari comu i cretini.

E allura comu a fari a stari 'cca, sutta a Busàmmara?
I così su dui: o 'nchiusu 'nta me càmmara
o "vossìa benerica" e "baciamu li manu":
e mi sentu 'na merda, no un cristianu!

Haiu dui vuci prepotenti
'nta me testa:
una dici: "resta";
l'autra: "vatinni ca nun c'è nenti!"

Ccà c'è ogghiu bonu e u megghiu mustu,
ma un si capisci cu è daveru giustu,
ccà c'è vinu e ricotta
e pi festi di' Santi sparanu botta;

ccà c'è ménnuli e racìna,
ma haiu un gruppu 'nte cannaròzza ogni matina,
quannu pi cuminciari a iurnata
viu o zu Minchia 'nmenzu a strata

e, si vogghiu stari cuètu,
nun n'ha sentiri fetu,
ci haiu fari a 'ncinsiata,
a ripassata,
a 'ncannistrata:
"Bona giornata, comu iamu?
vuatri sì ca siti un bonu Cristianu,
e p'u beni c'aviti fattu nun c'è nummaru né misura
e chiddi chi ni dicinu mali su sulu traritura!

Chistu è sicuru..."
Ma chi cazzu è chi è sicuru?
Ca m'aviti futtutu a vita,
e puru u futuru!

Domenico Passantino