FRANCESCA DI MARCO, "A catacina" (una storia siciliana vera!)

Francesca con suo padre

‘A CATACINA
(una storia vera)

-Matri quantu mi siddìa
com’un vecchiu ca si vrucculìa
nun mi spercia di parrari
e m’abbutta pur’a campari.

Mi siddìa stari curcatu
e macarica pur’assittatu
di susimi unn’am’a parrari
m’abbutta puru sbadigghiari

Mi siddià puru a siddiarimi
e cu la liscìa puru a lavarimi
nun mi la sentu di caminari
né di grapiri vucca pi manciari

-Chissa è la catacina
frivicciola di matina
ca nun duna posa e abbentu
‘un c’appizzari ‘u sintimentu

Chi camurrìa di catacina
di la sira a la matina
né dormi e né manci
puru ‘ntuppi e dopu chianci

-Lu cunfissuri ora chiamati
quantu ci cuntu li me piccati
ca sapidda quantu m’arresta
accussì macinga 'un mi fa festa

Lu nutaru ora chiamati
quantu vi spartu terri e casati
però cu ll’occhi m’at’a capiri
beddamatri vaju a ‘ntintiri

Lu dutturi ora chiamati
prima ca moru, e ci diciti:
-Veni studia stu casu raru
prima di sentiri “Si lu purtaru”

A me matri at’a chiamari
quantu mi fa ‘u biancumanciari
accussì annivisciu di stu patìri
pi oi 'u Signuri un mi fici muriri

Un mi futti cchiù ssa catacina
mi ‘ncupunu di matina
e la notti un mi scummogghiu
ca frivicciola nun ni vogghiu.

Vittina