LA VUCI DI FRANCESCA DI MARCO

Foto di Tania Azzara

 

Foto di Maria Ribaudo

      Maria Teresa Di Marco - Francesca, come la chiamano tutti a Marineo - ha ottenuto un nuovo meritato riconoscimento per i suoi originali versi in lingua siciliana. Abbiamo già scritto su Francesca e dedicato lo spazio che merita alla sua poesia - per tutti rimandiamo a http://cesim-marineo.blogspot.it/2016/05/francesca-di-marco-suona-e-balla-oltre.html.
        Oggi pubblichiamo, insieme alla poesia premiata recentemente a Cefalù, altri suoi versi che mostrano, ancora una volta, oltre al grande potere espressivo della nostra lingua madre,  il singolare spirito creativo di Francesca. fv

VUCI

Dugnu vuci a lu me cori

Dugnu vuci a lu duluri

Chiusu dintr’ a li nuttati

Di luna china ‘lluminati

‘Ncelu  lustru  fannu i stiddi

Si sciarrianu du attareddi

Lu me cori è ‘na balata

E li pinsera su’ di crita

Sta risata sona di vacanti

Centu taliati di la genti

Mi fazzu nica e tiru avanti

E ‘nta u me cori c’è lu nenti

Mi sentu varca ‘mmenzu a lu mari

Senza ventu di maistrali

Sirena chi nun sapi natari

E ciuri chi nun sapi ciuriri

Mi sentu volu senza distinu

Centu passi senza caminu

Vucca chi parra senza discursu

Mi sentu petra ‘nfunnu a un fossu

Vuci chi canta, cori felici

Nn’a me vita porta paci

Vuci canta nn’a lu me cori

Vuci astuta lu me duluri

Vuci chi canta, Diu la binidici,

Dintra di mia tu nun taci

Vuci canta sta ninna nanna

Io cca e tu a ddà bbanna.

*****

VENTU

Ventu chi forti ciusci

E cchiù nun t’addurmisci

Ventu c’ ‘a me finestra sbattisti

Li me pinsera t’arrubbasti

Io ventu vegnu di luntanu

M’ammuttari un catamaranu

Omini e fimmini dispirati

Di notti  ‘nviaggiu tutti scantati

Ciusciu forti e nuddu mi senti

Nuddu accurri a ddi lamenti

Di sangu, lacrimi e disperazioni

St’umanità china d’afflizioni

Io ventu sugnu,  ‘unn aiu manu

Pi purtalli cchù luntanu

Pi sereni iddi campari

Nni morinu troppi mari mari

Mari  granni e senza cori

Cimiteru ‘nfunnu pi cu mori

Terra luntana suspirata

Dulura ‘mpettu di cutiddata

Io ventu sugnu,  e chianciu

Io ventu sugnu,  e ciusciu

Io ventu, sulu, spinciu

Io, ventu, ‘un m’addurmisciu

*****

‘NCANTISIMU DI LIBERTÀ

A Francesca Amato

Veni veni farfalledda

sona sona ciancianedda

sata ‘riddu meula atta

ca la libertà un s’accatta

Balla forti furrìa vesta

‘a tammura ti fa festa

canta forti senza iritinni

ca la libertà un si vinni

Sbapura ciavuru lannareddu

di vinu inchi un ciaschiteddu

caccia fora nova mala

‘a libertà un s’arriala

Vola vola taddarita

catarinedda si marita

avi truscia e fina robba

ca la libertà un s’arrobba

Crisci crisci lavureddu

Di farina un sacchiteddu

Arridi bedda vasa nanna

‘a libertà un s’addumanna

Cantari ridiri e travagghiari

fa lu scrittu e po’ sunari

dintr’a chiddu chi tu fa

c’è beddu ciavur’ ‘i libertà

È vulari di pinsera

curriri scavusa nn’ ‘a trazzera

scriviri e leggiri ‘na puisia

Ca la libertà un si mmidìa.

INCANTESIMO DI LIBERTÀ: Vieni vieni farfalletta/suona suona campanella/salta grillo miagola gatta/che la libertà non si compra/Balla forte gira veste/il tamburo ti fa festa/ canta forte senza andare/la libertà non si vende/ Emana odore oleandretto/di vino riempi un fiaschetto/caccia fuori la nuova mala/ la libertà non si regala/ Cresci cresci   frumentino/di farina un sacchettino/ ridi bella bacia nonna/la libertò non si domanda/ Cantare ridere e lavorare/fare i compiti e poi suonare/dentro a quello che tu fai/c’è bell’odore di libertà/È volare di pensieri/correre scalza per i sentieri/scrive e leggere una poesia/la libertà non ha/prova invidia

*****

Ballu di paci

Balla la luna

Di stiddi na cruna

Balla lu suli

E unn’haiu cchiù paroli

Ballanu li Santi

Nni caminanu davanti

Ballanu i tri Re

E u Picciriddu unn’è?

Balla u cielu ‘ntunnu

Furrìa tuttu lu munnu

Balla un pisci ‘nfunnu a lu mari

N’aceddu abballa cu li so ali

Balla la luna, balla lu suli,

Ballanu i Santi e ogni criaturi

Balla u Bamminu c’ ‘u so piduzzu

Balla lu Patri, San Ciusippuzzu

‘Un lu sacciu, ma mi piacissi

Ca ‘a Madonna puru abballassi

Cu pedi scavusi e ciancianeddi

Ballassiru puru i vicchiareddi

Mugghi ballari ca fari la guerra

Mugghi baschiari e ‘un pusari ‘nterra

Sta biddizza è chidda ca mi piaci

Veni e balla, stu ballu di paci.

Balla, la luna/ di stelle una corona/Balla il sole/e non ho più parole./ Ballano i Santi/ci camminano davanti/Ballano i Tre Re/e il bambino dov’è?/Balla il cielo intorno/gira tutto il mondo/balla un pesce in fondo al mare/un uccello balla con le sue ali./Balla la luna, balla il sole/Ballano i Santi e ogni Uomo/Balla il Bambino con il suo piedino/Balla il Padre, San Giuseppino./Non so, ma mi piacerebbe/che la Madonna ballasse pure/a piedi scalzi e con campanellini/ballerebbero pure i vecchiettini./ Meglio ballare che fare la guerra/meglio avere il fiatone e non toccare terra/questa bellezza è quella che mi piace/Vieni e balla, questo ballo di pace.

Francesca Di Marco